الأربعاء، 18 مارس 2015

فيلم نسر البرية كامل للمتنيح ابونا فلتاؤوس السرياني كامل

اضغط على الرابط اسفل

الجمعة، 27 فبراير 2015

الجمعة، 20 فبراير 2015

صعبان عليّا منك يارب ..
دانا عمرى مابخل بيه عليك
بس كان عشمى زيّ اى اب
اخده فى حضنى قبل ماتاخده ليك ..
ماهو انت فى الاصل اديتهونى
يعنى هو بس كان عندى ضيف
بس غصب عنى اتعلقت بيه
و يا حبّة عينى كان ضيف خفيف ..

طب كنت قوللى انه مش هيطوّل
كنت حتى عملت حسابى
او اخدت بالى من الاول
وماخليتوش اغلى احبابى ..

بس اقولك .. انت برضه كريم
وريتنى معاه احلى ايام
ولا عمره كان شقى ولا لئيم
وكان كلامه احلى كلام ..

كان نفسى يكبر قدام عينى
ولا يتغرّب عشان القرش
غصب عنى ماكانش بإيدى
انى اقوله خليك ماتسافرش ..

بس اهو سافر عشانى واللى ليه
امه واخواته وصبية حبّها
عشان يحقق اللى حلم بيه
انها تملا قلبه ويسكن قلبها

بس خلاص الواد غاب وراح
ولا عدت هاقوله انا مستنيك
سافر وسابنا كلنا فى جراح
ومن برة برة خد طريقه ليك

انا عارف انه دلوقتى عندك
وأكيد مبسوط باللى هو فيه
بس عشمى يارب فى حنيّة قلبك
قلبى هيقف .. هاموت عليه

اقولك ع اللى واجعنى كمان
لما شوفته على البحر لابس خفيف
رن صوته الصغير فى الودان
مش هتودينى يابا البحر فى الصيف

اديك روحت يا عينين ابوك
بس من غير ماتاخدنى معاك
ولا هان عليهم حتى يدفّوك
قال ايه واقفين يتصوّروا معاك

وقال ايه رافعين سلاحهم عليك
فاكرينك جبان هتخاف زىّ العيال
مايعرفوش انى يوم مالمست ايديك
قلت لهم ولدى دا سيد الرجال

قتلوك وانت قدامهم اسد
قاعد بتدعى للى خلقهم وخلقك
فكرتنى بيوم ما قالولى دا ولد
ربنا يخلّى ولا عمره يفارقك

بس اديك سبتنى يا ابن ابوك
ولا فرق معاك حالى انا وامك
وياريتهم قتلوك ورجعوك
كنت ابوس راسك واضمك

يارب انا قلبى على ولدى موجوع
شحّتنى بس صبر على صبرى
مش هاقولك ليه البكا والدموع
ولا هاقولك ليه طوّلت فى عمرى

هاقولك انه من يوم ماسافر
واحشنى صوته .. ماباعرفش انام
رجايا فيك تلبّى لى طلبى
اشوفه حتى لو فى المنام

والكلام ده اكيد حقيقى جدااا ...